英國傳媒報道，費天王去到倫敦比賽，幾乎每晚都打電話到當地專做咖喱嘅「拉吉杜特飯店」叫外賣，費達拿同懷孕嘅太太一齊留喺酒店開餐，由於經常幫襯，所以飯店老闆都畀個九折佢。

網球明星輪住幫襯

據呢間飯店嘅「咖喱大王」爆料，雖然費達拿鍾意食印度咖喱，但就講明唔好太辣，幾乎晚晚都叫「烤雞丁紅咖喱」。

除咗費達拿兩公婆之外，呢間飯店亦係好多網球明星嘅「飯堂」，例如希域、威廉絲姊妹、舒拉寶娃、魯迪克，甚至名宿阿加斯、娜華蒂露娃等，都經常光顧。

其實英國新星梅萊都係咖喱擁躉，佢喺溫網開賽前就自爆都有歎咖喱輕鬆吓。至於咖喱係咪真係對打網球有幫助，就要等專家深入研究嘞！