本文重點
NBA總決賽Game2聽朝開打，落後嘅奧蘭多魔術要力圖喺洛杉磯湖人主場贏番場，阿Bob覺得佢哋除咗要防範「外患」，依家最重要係先平定「內憂」。魔術控衞尼爾遜養傷復出本來應該值得開心，但偏偏喺季後賽一直擔任正選嘅艾斯頓就覺得自己畀人搶走出場時間，公開炮轟教練雲根迪大細超，唉！咁大個人都唔爭氣，阿Bob就話湖人今次肯定趁你內亂搵着數！（有線165台、now 670、高清翡翠台及廣東體育周一早上8時直播）
無可否認艾斯頓季中轉會魔術後嘅出色表現，係球隊可以入到ＮＢＡ總決賽嘅重要因素，不過隨住球隊原本嘅正選控球後衞尼爾遜復出，艾斯頓嘅上陣時間就由原先平均33分鐘跌到上場嘅25分鐘。
雲根迪被嘲偏心
出名臭脾氣兼口沒遮欄嘅艾斯頓即刻公開發爛渣：「我真係覺得好奇怪，有眼嘅人都應該睇到，作為正選竟然要成個第二節坐冷板，成場波我坐咗差唔多半個鐘，呢個就係我表現唔好嘅原因！」
抖咗四個月復出第一場波就打咗23分鐘，雲根迪亦好難唔畀人覺得偏心尼爾遜，好在尼爾遜仲識得以大局為重，出言安撫艾斯頓平息糾紛：「我復出只係想幫球隊，絕對唔係想搶正選，我覺得艾斯頓嘅表現絕對值得做正選。」魔術有艾斯頓呢個計時炸彈，而教練雲根迪嘅經驗同功力亦遠遠不及湖人嘅積遜教練，睇嚟湖人聽日絕對可以再下一城。