本文重點
魔術能夠殺入總決賽，「防守專家」比杜斯絕對功不可沒，但唔講唔知，原來呢位法國好手最欣賞嘅球員，正正就係總決賽對手高比拜仁，佢今季仲全程着住高比仔型號球鞋添！所以比杜斯賽前表示，總決賽決定「換鞋」，以佐敦型號對戰高比仔。
高比拜仁好波係人都知，所以連魔術外援比杜斯都好欣賞佢，入行以來一直視佢為偶像及學習對象。亦因為咁，比杜斯最鍾情嘅鞋款亦係以高比拜仁命名嘅型號，佢賽前表示：「我有好多對高比型號嘅球鞋，今季亦係着住佢比賽，但喺總決賽舞台上，我肯定唔會再着對手嘅鞋款，我會改着佐敦系列應戰。」
大帝切除良性瘤
事實上，向來擅長防守嘅比杜斯，總決賽亦會被派遣Mark高比仔，雖然任務極之艱辛，但佢賽前就話會拚死唔畀高比拜仁輕易接波，尤其係第四節，盡量減低佢起手嘅機會。至於魔術另一主將劉易斯賽前就向傳媒表示，主力尼爾遜復出並唔會對魔術有太大幫助，皆因呢位明星賽控衞已經缺陣多月，根本缺乏狀態及比賽節奏，現階段對球隊貢獻唔大。
另方面，「大帝」勒邦占士出局之後，日前亦接受咗切除頷骨良性瘤嘅手術，解決多月煩惱。今次手術用咗五小時進行，因下顎位有大量神經及血管，所以需時較耐，但占士現已回家休養。