本文重點
往事不堪回首，克利夫蘭騎士出局已成事實，球迷想睇占士對高比嘅總決賽，惟有等多年啦！不過阿Bob知道「大帝」嘅贊助商真係喊得一句句，話說佢哋已經製作好占士對高比嘅總決賽「木偶造型」廣告，原定全球見街，但如意算盤打唔響，計劃惟有暫時擱置。
抽起占士高比木偶對決
雖然香港觀眾仲未喺電視見過高比仔同占士嘅木偶造型，但其實兩人嘅贊助商，早已將多輯木偶造型的宣傳片段上載於其網站中（http://inside.nike.com/blog/nikebasketball）（圖），因造型非常可愛，所以廣告已熱爆美國，其中一段內容係講及高比向占士大晒三隻冠軍指環，令占士非常無奈。不過，因占士已無緣總決賽，所以贊助商亦唔會將廣告推出。除運動贊助商之外，美國可口可樂公司原先亦已為旗下飲品「維他命水」，提前拍好兩人總決賽對決嘅廣告，可惜同樣要抽起。
魔術主力控衞有望復出
不過，阿Bob認為騎士出局最受影響始終係自己，皆因今季又攞唔到總冠軍，占士大有機會於2010年合約期滿後離隊，去加盟一支更有機會奪冠嘅球隊。據估計，若占士真係離開騎士，球會價值至少大幅減少一億美元之多，難怪騎士好驚「大帝」走人。
另一方面，14年後再次打入總決賽嘅魔術獲得振奮消息，因肩膀受傷嘅主力控衞尼爾遜有望喺香港時間周五早上展開嘅總決賽中復出！此子於季後賽前已宣布收咧，但基於球隊打入總決賽，而佢康復情況亦非常理想，早前已經復操，所以魔術總經理都指出佢有機會復出，增強「Beat LA」本錢。