本文重點
只差一場勝仗，湖人就可以再度打入總決賽！尋日西岸決賽第五回合，高比拜仁改變打法，減少起手，改作串連角色，結果高比仔激活咗加素及奧當，兩人均交出「雙雙」數字，最終湖人以103比94擊敗金塊，場數領先三比二，只要聽朝作客再贏一場，就可以提早進身西岸決賽。（now 670及廣東體育周六早上9時直播）
領先3:2明早贏埋就掂
湖人上場輸波，多少因為體力唔及對手，後勁不繼所致，不過今場就大大改善呢個問題。今場湖人決定改變進攻模式，唔再側重高比仔一個，平衡番個攻擊點，令金塊更難防守。兩軍三節過後打成76平手，但第四節就係湖人天下，加素、奧當等連續爆入籃底，早段已為湖人搶得領先優勢，及後金塊有中鋒連尼六犯離場，湖人控制大局，最終贏金塊103比94，總成績領先三比二。
雖然高比拜仁依然係湖人得分最高嘅球員，貢獻22分，但佢全日僅作出13次投射，較前幾場少一半左右，而佢今場亦有8次助攻。至於「第六人」奧當就打出今個系列代表作，今場攻入19分及14個籃板球，成為一路奇兵，而加素亦貢獻14分及10個籃板球。
金塊方面，雖然安東尼攻入全場最高31分，但其他隊友唔生性，尤其三分射手JR史密夫，佢10次三分投射竟然只入得一球，成為輸波關鍵之一。兩軍聽朝將會決戰第六回合，由金塊主場。