湖人破金領先2:1

本文重點
湖人上場大部分時間領先下被逆轉,估唔到今場就輪到金塊!西岸決賽第三回合,金塊喺「魔鬼主場」出戰下,開賽後一直領先湖人,三節完結後更有八分領先優勢。可惜佢哋犯咗對手上場嘅過失,被湖人末節大逆轉,最終湖人贏一○三比九十七,總成績領先二比一,抵銷番上場主場嘅失利。

金塊今場有個好開始,首節藉安東尼攻入十四分,早段已處於領先優勢,第二節兩軍打得較緊湊,結果半場結束後,金塊以五十二比四十八領前四分。金塊第三節繼續向湖人施壓,JR史密夫完節前射入壓軸三分,助主隊領先八分帶入第四節,不過佢亦因為入完波太多嘢講,被球證判罰技犯。

高比歸功阿利沙

雖然處於劣勢,但經驗豐富嘅湖人末節沉着追分,加上第四節開賽頭五分多鐘內,金塊僅得一分進帳,結果湖人好快已追貼分數。去到賽事最後卅七秒,金塊暫停後落後兩分,但簡安馬田竟然開波失誤,被阿利沙成功偷波後並博得安東尼六犯離場,阿利沙兩罰皆中拉開四分優勢,金塊時間無多,最終輸九十七比一○三,可以話完全係衰喺最後一節。

高比拜仁繼續保持勇態,個人轟入四十一分、六個籃板球及五次助攻,不過,佢賽後就將功勞歸畀阿利沙:「阿利沙速度快、手長腳長,而且佢好醒目,防守時一眼關七,佢嘅搶截經常成為致勝關鍵。」金塊方面,雖然安東尼首節已攻入十四分,但後勁不繼,全場僅得廿一分,成為金塊被逆轉嘅原因之一。