侯活鋤爆鐘破騎士

本文重點
東岸決賽尋日正式開打,休息超過一星期嘅騎士可謂大意失荊州,擁主場之利兼首節領先魔術十四分之下,下半場竟被對手大逆轉!最終騎士錯失兩個「絕殺」機會下,以106比107飲恨,「大帝」占士狂轟49分都冇用,今季季後賽初嘗敗績!「超人」杜域侯活唔只贏波咁簡單,今場一記飛身鋤樽仲整斷埋騎士個「24秒進攻計時器」,夠晒巴閉攞晒彩啦!

騎士八連勝告終

早早淘汰鷹隊嘅騎士,都唔知係咪有八日假期玩過龍,搞到今季主場第三次輸波,似乎騎士同金塊一樣,有得抖都未必好。杜域侯活開賽後一分鐘就「搞破壞」,一記雙手大力鋤樽震斷咗放喺籃框上方嘅「24秒進攻計時器」,賽事隨即停頓十分鐘,要將計時器放番落地先可繼續比賽。

騎士第二節繼續保持強勢,完半場前鳴哨一刻莫威廉士更從後半場拋入三分波,上半場領先十五分。不過第三節就係魔術天下,艾斯頓及劉易斯接連射入三分後,魔術一度將比分縮窄至兩分之差,更在第四節開賽後兩分鐘反先騎士。最後階段落後106比107嘅騎士剩餘14.7秒去組織攻勢,可惜韋斯及莫威廉士先後錯失「絕殺」一擊,最終僅敗令季後賽八連勝告終。

雖然騎士輸波,但今場表現最Sharp依然要數「大帝」勒邦占士,佢個人起手30次入20球,轟入49分、8次助攻及6個籃板球,創下職業生涯季後賽得分新高。至於魔術方面,杜域侯活雖然六犯離場,但佢命中率奇高,全場20射14中,攻入30分及13個籃板球,成為贏波頭號功臣,而射入關鍵三分嘅劉易斯則有22分進帳。