本文重點
【本報綜合報道】「大帝」勒邦占士依家仲享受緊悠長假期，皆因東岸決賽要到香港時間周四先開打，騎士仲可以抖多幾日。不過，幾支對「大帝」虎視眈眈嘅球隊就繼續為「奪帝」努力，就好似新澤西籃網咁，日前已經獲得批文，正式動用八億美元喺布魯克林市興建新場館，最早可以喺二○一一年啟用。
其實早喺○三年，籃網已經着手籌備興建新場館工程，不過因為要通過多個程序先可以落實，所以搞咗咁耐先成功獲得批准。籃網老闆拉特拿表示：「我真係好開心，因為我哋一直都想將籃網搬去布魯克林，希望建造一個足讓紐約驕傲嘅偉大場館。」
布魯克林建華麗場館
新場館將於今年十月動工，預計斥資八億美元去建造能夠容納二萬觀眾嘅華麗場館，一切順利嘅話，場館最早可以喺一一至一二年球季啟用，屆時籃網就會搬去布魯克林，絕對有助球隊喺一○年夏天爭奪自由身嘅勒邦占士。
現時騎士嘅知名度始終不及紐約及洛杉磯等大城市球隊，所以一直盛傳占士嘅贊助商都希望「大帝」可以改投一啲著名城市球隊，助佢成為真正嘅體育皇帝，籃網自然成為「大帝」考慮之列。