講到時下最熱門嘅話題，當然首推豬流感於美洲大規模爆發啦！今次豬流感已經喺全球製造恐慌同震撼，影響力可謂無遠弗屆，而世界體壇當然亦不幸免。作為世界體壇大國的美國，其國內三大運動包括NBA（國家職業籃球聯賽）、NFL（國家美式足球聯賽）及MLB（職業棒球大聯盟）亦勢必受到衝擊。墨西哥早前已經有足球賽事及世界盃跳水賽要閉門作賽，而正受病毒侵襲的美國，體育賽事受到波及只係遲早問題。
最壞情況閉門作賽
據業內人士估計，如果一向以商業掛帥嘅三大聯賽真的要「空椅」作賽，門券收入損失將達三億美元（約廿三億港元），如果計算埋周邊利益，損失金額更高達七億美元（約五十四億港元）。
豬流感殺到，各界嚴陣以待，人多地方最易傳染，已經有確診個案的美國，當局已經發出呼籲，要求民眾減少出街，更加唔好去人流密集嘅地方，更講到明最好唔好去球場睇波添！當局咁樣講，即使唔係好似墨西哥咁強制體育賽事閉門進行，但如果入場人數得番嗰小貓三四隻，咁一樣好大鑊。
一向依賴門券及廣告收入維持的美國三大體育運動NBA、NFL及MLB，將會面對嚴峻挑戰。先講NBA，依家打緊季後賽，由於球隊季票唔包Playoffs，所以波飛都係逐個階段計，甚至逐場計，所以一旦禁制球迷入場的最壞情況出現，各球隊門券收益即時泡湯，再加埋因觀眾入場消費而受惠嘅其他周邊商店食肆，估計NBA將唔見二億美元。
棒球美足損失更慘
另外，仲有NFL同MLB亦係極受歡迎的體育運動，由於棒球和美式足球場館的座位數目與NBA籃球場相比以倍數計，閉門作賽將令兩項運動損失更加慘重。不過，對於突如其來嘅豬流感，三大賽事的營運機構除咗求神拜佛希望疫情可以迅速受到控制，暫時都好難諗到應變嘅方法。