我叫Enson，因為加入咗巴塞足球學校，今次先有機會嚟到西班牙比賽，靜靜雞話你知，其實我唔鍾意巴塞，愛隊只有一隊，就係阿仙奴。
其實我哋呢班隊友中，好少人真係支持巴塞，反而曼聯fans就佔咗大多數，好似我呢啲阿仙奴躉就只得幾個，所以一同曼聯fans嘈交，就一定唔夠佢哋講。好在有記者哥哥訪問我，今日就可以借呢度暢所欲言。佢哋成日話C朗點勁點勁，來來去去咪又係踢佢一個，而且我覺得佢淨係識施丹轉身，轉完又轉，冇乜實際作用。法比加斯就唔同呢，畀啲直線幾毒呀，史高斯當弗時都唔係佢嗰皮啦。
話時話，我其實都係踢防中㗎，不過教練睇中我有氣走上走落，所以安排我踢右後衞。差啲唔記得講，巴塞班球星中，我都好鍾意亨利㗎，今次仲特登帶咗件波衫過嚟，希望有機會搵佢簽名，不過呢件係阿仙奴波衫，唔知佢仲肯唔肯簽呢？
郭崇毅 9歲 沙田小學5年級 右後衞