本文重點
【本報綜合報道】梅萊又捧盃啦！於邁阿密網球公開賽，呢位英國球手以六比二及七比五力壓塞爾維亞的祖高域贏得冠軍並迎來○九年賽季第三個錦標。經過今場比賽之後，梅萊積分又進一步提升，與現世界排名第三嘅祖高域只差一百七十分。往後舉行嘅泥地賽事，梅萊好有機會挑戰三甲地位。
○九年贏過拿度費達拿
邁阿密公開賽總獎金高達四百五十萬美元（約三千四百八十八萬港元），因此呢場比賽亦有「第五大滿貫」之稱。而梅萊能贏得冠軍可謂實至名歸，尤其對手係近期狀態都幾「弗」嘅祖高域，呢隻獎盃嘅含金量就更高。其實○九年梅萊已經擊敗過拿度、費達拿同祖高域，氣勢相當強勁。難怪唔少英國球迷都話，梅萊今屆有能力喺法國網球公開賽中，挑戰「泥王」拿度嘅地位。
另外女雙賽事方面，持外卡參賽嘅組合俄羅斯古絲妮蘇娃及法國的梅莉絲摩，於決賽以三比六、六比三及十比三反勝雷蔓及比絲姬組合。呢對外卡跨國組合已經第二次贏得冠軍，默契及力量係呢對組合嘅最大武器。