政情：綠置居攪珠 街坊追問招國偉有冇中
政府話搵地建屋難，然而私樓樓價高企，基層家庭根本供唔起，而房屋委員會推出嘅資助房屋計劃就成為一般受薪階層嘅置業途徑。公屋聯會總幹事招國偉尋日喺社交平台話，呢幾日有好多街坊走嚟問佢個「冧巴」係咪中咗？其實佢講緊嘅唔係六合彩，而係今期綠置居計劃前日（10日）攪珠。
招：我都好想中六合彩
睇番今期綠置居推出嘅鑽石山啟鑽苑，雖然同居屋規格大致相同，都係「清水樓」格局，但啟鑽苑仍被追捧為「樓王」，況且定價只係市價五折，平過同期嘅居屋啟翔苑，可想而知今次入表申請係幾咁踴躍，而攪珠結果揭曉後，招國偉話「其實我都好想中六合彩冧巴」。
求過於供，惟有講彩數。之但係，香港房屋嚴重短缺，變咗深層次嘅問題，政府真係要諗方法去消民怨先得嘞！