政情：得部收音機 岑敖暉想像睇奧運畫面
因去年6‧4非法集結案被判囚6個月嘅岑敖暉，喺獄中不但失去自由，亦都失去收睇奧運直播嘅機會。岑雖然無法置身於「同悲同喜」嘅人群中一齊感受奧運氣氛，但獨自喺囚室當中都有透過收音機得知奧運消息，就算傳到耳中只係得片言隻語，都已經令佢產生好多「共同存在」嘅畫面同想像。
岑嘅社交平台尋日上傳佢封親筆信，信中佢提到話呢兩年嚟無數「碰頭」、「聚在一起」嘅機會被剝奪，亦唔知身邊仲有幾多人剩低。而岑自從喺獄中獲得收音機，亦幾乎未聞好消息，之但係奧運嗰幾日就例外。
岑話喺新聞簡報之中，聽到商場有好多市民聚集，一同高呼、一同緊張、一同高叫「香港加油」；又或者聽到某個電台主持描述喺茶餐廳中開住手機睇直播，結果惹來茶餐廳內數十人圍住一部手機觀看賽事嘅情景，腦海中成個畫面就出晒嚟，仲話好想置身其中添呀。
月底先放監 料即轉還押
數數手指，岑敖暉應該喺今個月底就會服刑完畢，但預料屆時將會轉為還押，事關佢因為參與民主派「35+」初選案，被控違反《港區國安法》，岑「看見大家」嘅願望，真係唔知道幾時先可以實現喇。