政情：郭榮鏗獲法治獎 政界斥荒謬
遠走加拿大嘅前公民黨創黨成員、前議員郭榮鏗近日獲頒第五屆英聯邦法律會議法治獎，嘉許佢曾參與非暴力嘅拉布以圖阻《國歌法》通過。議員陳克勤直斥荒謬，批評郭喺議會內外都作出唔少違法行為，更縱容、煽動市民上街參與違法活動，反問點解可以頒獎畀郭呢？
立法會2019-2020年度內務委員會喺時任內會副主席嘅郭榮鏗主持下，舉行17次會議都未能選出主席，被批惡意拉布，及後立法會主席梁君彥向外間尋求法律意見解決難題。唔單止咁，包括郭在內嘅民主派議員喺立法會審議國歌法期間，亦都以叫囂、衝往主席台等方式意圖阻撓法例通過添。
未檢控唔代表冇違法
陳克勤話頒獎畀郭係荒謬、諷刺，直言郭多次阻撓議會運作，例如喺立法會審議國歌法期間阻礙審議工作，已經違反相關守則。陳又話喺反對修訂《逃犯條例》風波期間，郭作為議員唔單止冇批評暴力行為、捍衞法治，反而煽動市民上街，覺得佢冇資格攞獎呀！對於郭未被檢控，陳就話相信警方仲調查緊，但郭已經遠走高飛，陳強調未檢控並唔代表冇違法呀！
淪外國勢力政治棋子
本身係律師嘅議員張國鈞（Horace）都話對於郭獲獎感到難以理解，話完全唔明白拉布同法治到底有乜嘢關係；佢又質疑郭能否稱得上「非暴力」，指審議《國歌法》期間，有議員負責衝擊主席台，亦有人負責叫囂，大家都睇得好清楚泛民主派議員「犯罪團夥」嘅關係，並唔能夠話郭冇衝前，就等於冇參與成件暴力事件喎。
Horace又指泛民主派議員當時認為《國歌法》係惡法，但至今都冇人因為觸犯該法例而有不公義嘅裁決，並認為外國出於政治需要，先至將郭嘅行為英雄化並予以歌功頌德，以攻擊中央同特區政府。
至於郭所犯何事，Horace話佢自己心知肚明，否則就唔會突然走咗去，強調公民黨曾參與民主派35+初選，同埋屢次去外國唱衰香港都係事實，估計郭恐負罪責，以後都唔敢返香港喇！