政情：警國安處長蔡展鵬 將復工平調

蔡展鵬將短期內復工，平調接任人事及訓練處處長。

警務處處長蕭澤頤尋日出席活動後表示，蔡展鵬事件已經由三方面調查，分別交畀O記，之後轉交律政司調查並收到回覆，指案件無牽涉刑事成分，雖然係咁，因案件涉及高級警務人員嘅紀律行為，都要交畀公平公正嘅獨立部門處理，故此已按相關機制，交公務員事務局處理及調查。佢又強調「公務人員管理命令」獨立於警隊紀律機制，相信會嚴謹處理。

蔡接任人事及訓練處處長

蕭又講到，蔡展鵬目前仍然處於休假，不過就會喺本月中安排佢重返崗位，初步安排係平調去接任人事及訓練處處長。佢又指蔡展鵬服務警隊已超過25年，對其工作能力有信心。另外，據消息指原本人事及訓練處處長周一鳴，將調任刑事及保安處處長。而署任副處長﹙行動﹚兼任刑事及保安處處長袁旭健，將會於本月中正式「坐正」副處長﹙行動﹚一職。

袁旭健將正式「坐正」 警務處副處長﹙行動﹚一職。

周一鳴將調任刑事及保安處處長。