政情：反修例撕裂社會 梁美芬促設立復和專員
前年反對修訂《逃犯條例》事件導致社會嚴重分化，因政見而導致家庭關係出現裂痕嘅現象並不罕見。經民聯議員梁美芬（Priscilla）尋日宣布喺暑假成立平台舉辦多項活動，以修補社會撕裂，又提出設立「復和專員」調解社會紛爭。
Priscilla公布成立平台「凝聚民心」，平台總共有67名來自唔同界別嘅發起人，佢話一年幾前已醞釀成立，但平台唔係智庫或者政治組織，而自己係以個人身份參與。該平台建議政府設「復和專員」，Priscilla話香港近年經歷痛苦，加上有家庭因為政見不合而出現撕裂，認為社會需要有復和機會，但要參考其他國家嘅做法，未來會同政府提出建議方案。佢哋未來亦會就點樣解決不適切居所問題向政府提交研究建議。
須擴大愛國隊伍
至於點樣令更多持不同政見嘅市民參與平台活動呢？Priscilla希望大眾唔好抗拒建制派嘅標籤，認為必須擴大愛國者隊伍，強調平台盡量避免討論具爭議嘅政治性議題，事關佢哋目標係凝聚民心。