政情：體院擺烏龍寫錯名 女飛魚變「何思蓓」
香港運動員東京奧運獎牌繼續「添食」！繼24歲香港「劍神」張家朗周一奪得男子花劍金牌後，香港「女飛魚」何詩蓓（Siobhan）亦為港爭光，喺女子200米自由泳決賽以1分53秒92勇奪銀牌，並打破亞洲紀錄，更拿下香港泳隊史上首面游泳奧運獎牌。
新聞稿6次出錯
本港各界亦衝出來同慶賀，身為香港體育學院主席嘅林大輝當然都唔例外，但唔知係咪太過興奮，體院新聞稿將何詩蓓嘅名字，寫錯成「何思蓓」，仲要出錯6次咁多。
體院發出嘅祝賀稿第一句已經寫錯，首先提到「香港體育學院（體院）主席林大輝博士SBS JP恭賀香港游泳運動員何思（詩）蓓繼劍擊張家朗之後」，其後第二、三段介紹何游泳訓練及比賽生涯時，又分別每段寫咗多次「何思蓓」。
林大輝作為體院主席，見到運動員得獎當然興奮，早前仲話會幫獲得奧運獎牌嘅運動員做業主咁話，但後尾就變成「資助」獎金250萬港元做業主；尋日出稿又有蝦碌寫錯名，但相信Siobhan都會好大方，唔會咁介意嘅。