政情：署任刑檢專員 楊美琪變身大律師 稱無意跳船
過去律政司被指青黃不接，隨着刑事檢控專員梁卓然去年底離職，此職位由刑事檢控科副刑事檢控專員「輪流署任」，被嘲為「避政司司長」嘅律政司司長鄭若驊至今未搵到替任人選。其中身兼首席政府律師嘅楊美琪，更前後兩次出任署理刑事檢控專員。至尋日，楊喺高等法院申請由律師轉任為大律師，並獲法庭認可。
楊美琪喺庭上致詞感謝「師父」Anthony Houghton，又形容工作不時充滿壓力。楊喺庭外受訪指感受「好特別」，但暫時冇諗過私人執業，會繼續喺崗位上為公義服務，亦冇考慮過會否獲正式升任刑事檢控專員一職喎。佢又強調律政司處理案件時只睇證據，唔會有其他考慮。
處理是次申請嘅薛偉成上訴庭法官，亦曾任刑事檢控專員，與楊共事多年，佢就提到能夠見證楊展開新一頁深感榮幸，又語重心長咁向楊美琪講到，現時本港處於複雜且充滿挑戰嘅時代，身為大律師需要守護法治，保障人權，維護《基本法》，為不公義嘅事發聲。
隨梁卓然離職後，各副刑事檢控專員輪流出任署理刑事檢控專員。先由律政司副刑事檢控專員兼資深大律師譚耀豪接替，至今年4月1日由楊美琪署任，為期3個月，及後再獲延任，至今年9月30日為止。
議員曾轟鄭若驊力有不逮
其實喺楊最先獲署任時，就有議員質疑係咪律政司無精英可處理刑事案件，又憂心檢控進度及質素備受影響，仲覺得一定係鄭若驊本身名聲唔好，難吸引人才同佢坐埋同一條船，鬧爆咁長時間都未能夠搵到人選，實在係力有不逮。
唔通今次楊美琪獲認可為大律師，都係因為早前多番硬啃豬頭骨，做咗幾轉署理刑事檢控專員，先捱到個安慰獎？而申請轉任大律師，大多都係為將來鋪路，或「跳船」離開律政司轉為私人執業，過去律政司離職潮已相當嚴重，情況再繼續嘅話，都唔知鄭若驊點收科喇！