政情：涉欠供MPF未甩身 王進洋厚顏請人
離島區議員王進洋上周五因涉嫌未於限期內為其僱員交強積金（MPF）供款，被警方拘捕，其後獲保釋外出。但事隔兩日，王進洋就再透過社交平台貼文招聘全職同埋兼職議員助理，到底今次會唔會按時供僱員強積金？
隨時再趕人走
王進洋日前公開招聘全職及兼職議員助理各一名，講明係要做佢嘅分身，日常需要處理電郵、統籌活動、跟進街坊求助個案等基本議助工作。雖然列明每周工作44小時，但若果交到貨畀佢嘅話每日可以返2至3個鐘就走得，兼且除勞工假外，仲可享「社運罷工假」。之不過，王又表示謝絕「老屎忽」職場文化，佢話如有發現會即時趕走啊！嘩，咁惡嘅？
事實上，王進洋趕人走都唔係第一次嘅事啦，早前佢涉遲交僱員強積金被捕，正正就係因為佢同室友起爭執並打算趕走對方，室友報警繼而揭發佢遲咗交強積金囉。王其後澄清該名室友並非如外界所講係佢女友，事後亦有再招室友，但有冇人睬佢就不得而知喇！