政情：梁美芬做主角拍片 斥官僚礙科技發展
曾開金口展歌喉嘅經民聯議員梁美芬（Priscilla），近排又有新搞作，首度擔任主角拍微電影，故事內容係佢穿越未來遇到同自己一模一樣嘅機械人，藉此討論人工智能對未來社會帶嚟咩危機。講到科技發展，Priscilla都忍唔住批評政府思維冇前瞻性，官僚制度阻礙科技產業鏈發展，令香港新興專業產業發展落後。
Priscilla尋日話，今次拍微電影係同少數族裔團隊合作，希望喺沉重社會氣氛下，可以帶嚟啲新意思，而呢齣微電影就花咗半年時間製作，再加上4集清談節目，向公眾講解現時有關太空法律真空問題及外太空競賽等議題。佢更用咗9個月時間，物色啱心水嘅機械人，冀為製作團隊激發構思。佢笑指今次係佢嘅「處女作」，話自己都幾入戲，好多時都係「一take過」，所以只係用咗兩日左右就完成拍攝。
批政府欠前瞻性
佢喺微電影入面亦有重提2019年喺立法會提出嘅議員議案，要求政府修例監管人工智能電腦同機械人收集資料嘅情況，可惜至今仍未獲政府正視。佢批評政府欠前瞻性，對時代轉變及未來危機缺乏意識，以致香港新興專業產業發展落後，譬如金融科技產業方面，唔少攻讀相關學科嘅本地畢業生，因缺乏發展機會而需轉行賣保險。