政情：陳帆記招除罩答問題
雖然政府要求，任何人若身處公眾地方必須戴口罩，之不過天時暑熱，口罩冚住半塊面又難免感覺侷促。運輸及房屋局局長陳帆尋日出席記者會解釋劏房租管條例期間，就嫌戴口罩抖唔到氣，需一度摘下口罩回應記者提問，仲維持近三分鐘咁耐添。
銅芯口罩冇影
其實喺公眾場所除口罩，陳帆都唔係第一次。舊年七月，陳帆應邀落區到鑽石山富山邨街市巡視，期間佢就隨同大夥一齊除低口罩影合照嘞！睇番上次嘅紀錄，再對照尋日嘅記者會，陳帆都係戴外科口罩，而唔係由政府派發、可重用嘅「銅芯口罩」。其實舊年9月政府已經派發第二個銅芯口罩畀市民，方便替換，但陳帆依然選擇外科口罩，莫非佢信唔過銅芯口罩嘅質素？