政情：改建自校舍內故居 杜葉錫恩紀念館今揭幕
已故著名社運、教育家杜葉錫恩畢生為本港教育同基層作出貢獻，包括創立慕光英文書院服務九龍東學生。該校特意修復其位於校舍主樓6樓嘅故居，並改建成面積達2,000多呎嘅「杜葉錫恩紀念館暨慕光校史館」，更喺香港歷史博物館前總館長、曾於該校任教嘅丁新豹教授協助下，還原其生前辦公室嘅面貌。
9月對外開放 展出多件珍品
紀念館於今日揭幕，並將會於9月對外開放，設有4大區域，不單止介紹杜葉錫恩對香港教育、基層權益同反貪歷史嘅貢獻，並且展出多件珍貴展品，包括喺1995年立法局直選與司徒華世紀大戰時配戴嘅斜肩帶，以及獲首任特首簽名嘅臨時立法會大合照等。
杜葉錫恩生前與該校老師、學生關係甚佳，過去曾向多名有需要學生提供住宿同經濟支援，亦會「捉」中五、中七同學到其故居補習英文同練習口試。而紀念館外遠眺維港景色嘅休憩平台，查實係昔日杜葉錫恩同老師每年共賞新春煙花嘅地方。