政情：陸頌雄做「步兵」險仆親 何啟明齋叫小心 苦況懶問
想建議嘅政策夠貼地，最好係能夠切身體會啦。鑑於外賣平台嘅零散工欠缺福利同保障，勞工界議員、人力事務委員會主席陸頌雄早前就做咗半日「外賣仔」，親身感受呢個行業嘅辛酸，全程仲拍片記錄添，點知送外賣途中差啲仆親。佢嘅立法會前同事、來自同一個工會嘅勞工及福利局副局長何啟明，尋日喺立法會一個會議上，就話自己睇咗條片，仲叫陸小心啲睇路唔好仆親啊。不過陸就唔領情，質疑何嘅「初心」，又斥對方不如你自己去做吓外賣。
事緣立法會人力事務委員會尋日開會，討論數碼平台工作者以及零散工嘅僱員權益及福利。多名委員都話關注外賣平台嘅「假自僱」問題。議員鄭泳舜發言時就話，留意到陸頌雄拍片做「步兵」，指近年出現嘅外賣平台頗為賺錢，而依家做送餐工作嘅朋友亦愈嚟愈多，但政府對此竟然係冇數據、冇政策同冇保障，對從業員唔公平，促請勞福局制訂措施同指引為佢哋提供基本保障。
何啟明回應話，按現行法例僱員可受《僱員補償條例》保障，否則就要另作研究點樣處理，又強調局方關注打工仔因工受傷嘅問題，但係咪單由僱主承擔呢，就要視乎個別個案喇。何又透露自己有睇陸送外賣嘅片段，希望對方小心啲睇路，唔好仆親喎。何話音剛落，隨即引起在席議員爆笑。
若推卻任務或被扣薪
之不過，何啟明嘅「關懷」，陸就好似唔係咁領情啦。佢一臉正色，叫對方唔好淨係叫佢小心，跟住就質問何對於外賣平台嘅運作到底認識有幾深，又話自己當日擔任外賣員，如果推卻一啲路途遙遠嘅任務，以致接單率低於某個水平，就有被扣報酬嘅可能，又指佢當日做3個鐘只得80元報酬，仲低過最低工資。
陸繼續鬧爆何啟明唔去了解外賣員嘅苦況，批評對方點解要迴避問題，又問何個初心去咗邊度？建議何不如落場去做下外賣員，或者何安排下屬去體驗一下。
面對陸嘅連環炮轟，何啟明回應時顯得有啲口窒，只表示勞工處會調解相關個案、了解呢啲外賣平台是否對工作者構成「壓迫力」等。何又意圖將議員嘅提問交畀其他官員作答，不過陸都係窮追不捨，怒斥「問你呀副局！」