醫生流失 擬免試引入外援 梁智鴻促醫管局反思
本港公營醫療人手長期短缺，港府早前打算容許合資格嘅海外醫生免試執業，引嚟醫學界擔心會造成質素參差。醫管局前主席梁智鴻尋日出席活動時被問到引入海外醫生可唔可以為公營醫院人手流失止血，佢就反指醫管局應該先反思吓點解咁多醫生會流失啦！
梁智鴻承認醫管局嘅人手的確不足，但就反問醫管局係咪應該先反思吓點解咁多醫生會流失先呢？佢又指醫管局初期建立嘅大原則，就係希望能吸引、鼓勵同埋保留員工，但依家醫管局有無繼續保持原則就成疑。
指設立考試係保障市民
被問及政府對海外醫生水平嘅把關夠唔夠呢？梁就話香港一直以嚟都無反對海外醫生來港執業，佢認為設立考試其實主要係保障市民，等市民對醫療水平有信心，並唔係保障醫生嘅。