政情：戴罪緩刑 自知之明 辭任區會主席 單仲偕等DQ

根據《區議會條例》，如果區議員被定罪並判處超過3個月監禁，而刑期唔可以用罰款代替，不論係咪獲得緩刑，都將喪失議員資格。

網頁置頂欄目已被刪

若然區議員提出上訴，就會首先暫緩取消資格安排。翻查該區區議會網頁，原本置頂嘅主席欄目已被刪除，(先刂)雞嘅相關資料亦被移至網頁較低嘅位置。

(先刂)雞尋日回覆本報查詢時話，該區前區議員梁耀忠同樣因被判緩刑而失去議席，當時梁於2月中喺法庭認罪，一個月後被判刑，政府遲至5月底先至公布梁耀忠嘅議席由2月底起懸空，即對方早喺政府發出公布前3個月就已經失去議員資格。(先刂)雞話參考呢個情況，估計政府可能會喺8月先至刊憲，公布佢嘅議席早於5月已懸空。(先刂)雞直言明白到自己已被判刑，客觀嚟講已經唔係區議員，反問仲點繼續做區議會主席，又話依家情況令佢同一眾區議員同事處於兩難局面中。

話晒區議會主席嘅職責頗為重要，(先刂)雞話唔希望「拖住」同事工作，為咗區議會會議可以順利進行，佢最終採納區議會秘書處建議，主動辭任主席職務，咁樣剩餘嘅區議員就可以喺7月嘅大會上重新選舉主席喎。至於主席人選方面，早前就有傳支聯會常務秘書部召集人梁錦威係大熱人選，不過梁涉去年6‧4非法集結案，案件今日再提堂，即使佢成功當選主席，都唔知做唔做得長喇。