政情：等唔到「最後一刻」 劉珈汶提早辭任區議員
47名發起或參與去年民主派「35+」初選人士被控「串謀顛覆國家政權罪」，加上政府要求區議員宣誓呢兩件大事觸發泛民主派辭職潮。黃大仙區議員劉珈汶上個月話已經退出公民黨，不過就暫時留住區議員席位，話計劃喺最後一刻先辭職。不過睇嚟佢等唔切喇，宣布今日就會正式卸下區議員身份。
劉珈汶尋日喺社交網站發文，以最後一天為題，話將會喺今日正式卸下區議員身份，感激沿路遇上嘅大家，又引述歌詞話「問我初衷鏗鏘的答，不吞吐」。上月劉接受傳媒訪問時表明，離任之後唔會離開香港，會喺陣營中尋找身位繼續服務，亦有意繼續跟進原本嘅地區工作喎。
曾揚言不想宣誓
回帶睇番劉喺上月11日嘅言論，佢當時話唔想完成無理嘅宣誓要求，而喺「日漸敗壞」嘅區議會內委曲求全，所以計劃喺最後一刻辭任黃大仙區議員。