政情:設產假主任 懶游說 勞福局唔夠票 焗撤回

立法會自從冇咗泛民,「拉布」情況絕迹,審議法案甚至撥款速度都快咗唔少,更有指部分議員儘管口裏說不,但最終都唔會投下反對票。但誰知政府近日就有推上立法會嘅項目未能獲得足夠嘅支持,落得主動撤回嘅收場。

話說增加法定產假之後,去年政府提出開設一個首席勞工事務主任常額職位,但遭到立法會財務委員會否決。於是政府嘗試今日再闖人事編制小組委員會。當中將常額職位改為有時限性,即為期3年,月薪15至16萬,主責推行及監督改善法定產假嘅新措施,協助擬定及執行喺取消「強積金對沖」安排下向僱主發放政府資助嘅運作安排,另亦要確保職工會遵守《職工會條例》及相關法例,包括《港區國安法》、督導有關投訴職工會的調查及跟進工作等。

公僕架構有大量冗員 被促重整

不過,即使新職位加咗新職能,有關開位仍不獲建制各黨派支持,指公務員架構中存在大量冗員,勞工及福利局應重整人手,認為無必要開設職位。尋日政府方面知難而退,「跪低」宣布撤回有關項目。勞工處表示明白一啲立法會議員希望了解更多有關該項目嘅資料,處方希望有更多時間準備,並向立法會議員進一步解釋,又話會適時將該項目重新提交議會進行審議咁話。

對於有關項目未經審議,局方即「淆底」撤回,估計係當局始終未取得立法會足夠票數支持。人事編制小組委員會嘅22名委員當中,手持7票嘅建制大黨早前表明對開位有保留,認為唔少有關產假嘅工作已經外判,相信有足夠人手,現階段要量入為出,慳得就慳。更指日前勞福局局長羅致光同佢哋會面進行游說,但雙方無法達成共識,直接導致「數唔夠票」,需撤回有關項目。

新職位惹火 需處理撤MPF對沖

除此之外,因新職位需要處理取消強積金「對沖」安排工作,呢項「惹火」任務亦令到代表商界嘅議員失去支持嘅意欲。另有消息指,手持3票嘅經民聯同樣唔贊成開位。亦有多名議員表示,局方從未有向佢哋拉票,相信投下贊成票嘅機率少之又少。

議員謝偉銓同樣唔支持開位,佢話當局從無接觸佢嘗試拉票,又鬧爆政府官員真係好差,準備工夫做得不夠,仲笑言已經準備好質問佢哋,點知政府已撤回咗。謝又慨嘆,政府要以理服人,唔係求人就得。