政情：任期完結 黃潤達議辦影印機冇人要
《2021年公職（參選及任職）（雜項修訂）條例》已生效，當局最快今個月安排區議員宣誓，近半年來引起區議員辭職潮。辭職自然就要搬離議辦，原來其中一樣麻煩事就係要處置部影印機啊！早前宣布辭職嘅葵青區議員黃潤達尋日喺社交平台貼文，希望搵到人承接議辦部影印機。
仲有32個月合約期
黃潤達嘅任期喺尋日終結，辦事處亦都同時結束，但佢就話辦事處有一部多合一功能嘅影印機尚未有「歸宿」，仍有32個月合約期。佢話覺得價錢算平，所以叫有興趣嘅人士同佢聯絡。
嚟到區議員任期最後一日，佢尋晚就請朋友食告別飯，朋友仲買咗隻乳豬同酒，諗住同佢盡興咁話喎。