政情:叫長者善用科技上網 港府靠裝Wi-Fi同探訪

科技確實可以令生活更便利化,但企喺長者嘅角度,佢哋係咪易於掌握呢?政府尋日喺立法會一個委員會上話,依家全港有約六成幾65歲以上嘅長者會用互聯網同數碼科技,而政府目標喺2023年前將比率推高至七成,但有議員就批評政策唔全面。

政府有乜策略推動長者認識同使用數碼科技?勞工及福利局副局長何啟明喺會議上話政府透過唔同嘅措施,包括派外展隊上門探訪隱蔽長者,教佢哋使用智能電話同即時通訊軟件,亦會喺福利服務中心安裝Wi-Fi服務,方便長者使用。

何仲強調數碼科技只是手段,安老服務最重要是人與人嘅接觸,推動長者使用科技產品唔代表鼓勵佢哋長期留喺屋企。

不知原來唔捨得買流動數據

講到啲措施好到位咁,之但係多名議員提出質疑。議員梁志祥話唔少長者唔捨得花錢購買流動數據計劃,而唔肯使用資訊科技,促請當局提供資助,另一議員鄭泳舜關注疫情下唔少獨居或安老院長者無人探訪,當局應該善用科技解決問題。睇嚟呢啲先係要急於解決嘅問題,何啟明係咪要先諗計解決咗先呢?