政情：小學生問題轟炸 薛永恒口啞啞
政府官員平時出席立法會會議時，成日都會被問到口啞啞。創新及科技局局長薛永恒早前同一班小學生見面時，不但被問到日常工作，仲關心局方點樣幫佢哋推廣新發明，搞到薛「滴晒汗」，唔通連小學生嘅問題都難倒佢？
事緣創科局早幾日喺Facebook上傳薛同幾個小學生拍攝嘅花絮，佢自言同小學生相處好輕鬆，聽到對方話好怕講嘢得罪佢時，佢更即刻叫大家唔使擔心，有咩都可以照直講喎。
從投資策略問到公廁衞生
點知呢班小學生即刻提出唔少疑問，薛不但被問到返工日常，更被問到如果佢哋嘅發明「智能坐廁」推出市面後，局方會點樣幫手推廣。呢班小學生仲問薛會唔會做第一個使用者，甚至投資佢哋嘅發明或者邀請朋友投資，問題及後更延伸至改善公廁衞生政策。面對咁多提問，似乎考起薛，搞到佢都要回一回氣，諗諗先答到。