政情：生育率低 歸咎暴疫 羅致光吹水無敵

羅致光將生育率低歸咎暴潮同疫潮。

只談現有政策 毫無辦法

羅致光不但止喺網誌講生育率低，仲預料未來嘅走勢係低處未算低添！面對咁嚴峻嘅情況，佢並冇提出鼓勵生育嘅措施，只係講返現有政策，例如法定有薪產假自舊年12月11日開始，延長至14個星期，羅就話截止上周四，僱主申請發還4個星期額外產假薪酬只涉及601人，認為由於有關安排啱啱起步，所以係合理數目喎。而為增加幼兒服務，佢就指政府已多管齊下增加資助幼兒服務嘅質及量，包括透過將幼兒服務需求寫入《香港規劃標準與準則》，及嘗試透過購買物業喺18區增加資助幼兒中心。

拒設援助金 冇為市民諗

雖然羅IQ高，但經常被斥只係讀書叻，但思維離地。就好似喺疫情持續、失業率飆升情況下，佢仍堅拒設失業援助金，多次畀議員圍插，更有議員鬧爆佢唔想做或無能力做就走人，畀有才能嘅人士頂上更好。

羅致光

陸頌雄

對於羅今次指生育率低同社會運動及疫情有關，議員陸頌雄就批評羅將問題睇得太「離身」、唔夠肉緊，直指出生率及人口結構問題與勞福局工作有關，羅作為問責官員應提出相關具體措施應對問題，而唔係好似時事評論員咁單純吹水。佢又指出羅一直離唔開學者思考方式，直言唔夠貼地同未能夠喺市民角度出發，強調良好管治係要令市民感受到幸福同安全感。

陸又認為局方不但要設立失業援助金，唔少夫婦或因為經濟唔明朗而對生小朋友卻步，所以如果政府推出新生嬰兒基金，相信可以減輕家庭頭幾年照顧小朋友帶嚟嘅額外開支負擔。