政情：維園盂蘭勝會 疫下停辦 胡炎松搞分享會代替
每年8月下旬嘅盂蘭勝會，係中國人敬祖弘孝嘅重要活動，本港不少地區均會舉辦唔同活動，香港潮屬社團總會過去都會一連三日喺維多利亞公園舉辦「盂蘭文化節」，但礙於疫情關係，上年就無奈要停辦。事隔接近一年，疫情仍然反覆，致力推廣盂蘭文化嘅總會常務會董胡炎松就透露，預料今年維園盂蘭勝會都無法舉行，但就會用分享會代替，堅持向大眾推廣盂蘭文化。
邀請不同人士作交流
潮屬社團總會於2015年開始，連續多年舉辦盂蘭文化節，當中包括搶孤競賽、盂蘭文化歷史展覽等一系列活動，至到上年疫情爆發，活動無奈腰斬。
今年有冇機會復辦？胡炎松就話現階段仍未有定案，下個月才會正式拍板，呢段時間會時刻留意疫情發展。不過，佢都坦言搞唔成嘅機會大，原因係變數太大喇！胡解釋，若定咗要做，一旦投入準備，預定嘅嘢包括人力物力資金等都收唔番，如果疫情轉壞，活動難以舉行。就連康樂及文化事務署都唔會借出維園嚟舉辦活動，到時一切都成泡影。但佢就話就算搞唔成盂蘭勝會，都會舉辦分享會，屆時會邀請唔同人士嚟分享盂蘭文化，大家可以期待吓嘞！
