政情:許智峯擦美國鞋 氹公僕互相出賣

正被警方通緝、目前流亡澳洲嘅前民主黨(白鴿黨)立法會議員許智峯(峯鴿),尋日就喺Facebook(Fb)發貼文,揚言正研究制訂「該被制裁的香港官員名單」,針對高級公務員同其他公職人士,仲呼籲現職公務員「出賣同事」添。有時事評論員分析,峯鴿出貼文用意在於討好美國,但就形容峯鴿過去謊話連篇,只有蠢嘅公務員先會信佢講嘢!

自《港區國安法》喺舊年6月30日深夜在港實施後,美國先後多輪制裁多名中港官員作回應,涉及本港特首、多名司局長同警方高層。峯鴿尋日喺Fb發貼文,提到「國際戰線」嘅其中一個工作重點,就係呼籲國際制裁「打壓香港民主、自由、法治的官員」,形容香港仲有好多高官或者高級公務員,「同樣助紂為虐、欣然為暴政服務」喎。

叫廣傳於公務員群組

峯鴿仲舉例話有好多政府部門中人都值得被制裁,仲特別呼籲喺政府體系內各部門工作嘅人「篤灰」,向佢提供其他同事嘅姓名、職級同所屬部門等資料,等佢整理同核實後就會加入名單,叫國際社會考慮制裁。佢甚至喺貼文入面加入Hashtag,話「#請廣傳於公務員群組」添!

時事評論員陳雲生形容峯鴿做法極度卑鄙、無恥,目的只係為討美國人歡心,喺美國政府面前立功,形容「助紂為虐、欣然為暴政服務」嘅人應該係峯鴿先啱。佢又批評,峯鴿自己逃避在港嘅法律責任後,喺外國說三道四,做法完全唔要得!

棄保潛逃 難以取信於人

不過,陳坦言以峯鴿過去假借謊言離港、實質棄保潛逃嘅經歷,令佢難以取信於人,形容只有蠢嘅公務員先會信佢嘅說話,認為貼文喺公務員團隊之中所起作用不大。陳又認為香港政府應該硬起來,唔應該維持被動,反而應主動制裁協助黑暴嘅外國官員,以及當日協助峯鴿潛逃嘅兩名丹麥國會議員等。