政情：稱宣誓留任 陳梓維貼文疑抄襲
尋日立法會三讀通過涵蓋區議員宣誓嘅《2021年公職(參選及任職)(雜項修訂)條例草案》之前，已經有唔少民主派區議員「跳船」請辭自保。至於油尖旺區議員陳梓維，尋日凌晨透過社交平台發文，指自己對選民嘅承諾尚未實現，決定宣誓留任直到今屆任期完結為止。誰知有眼利網民發現，佢呢則貼文嘅內容，竟然同屯門區議員朱順雅前日表明宣誓嘅內容一樣。
其實陳梓維早前已表態願意宣誓，佢今次發文就重申，願意配合政府加設宣誓嘅要求，又話考慮到2019年區議會選舉時，對選民作出嘅承諾尚未實現，因此決定宣誓留任，直到本屆任期完結。佢又話明白民政專員經常以違反區議會職能為由，禁止會上討論民生議題，認為前路難行，但街坊都唔願意走回頭路，鼓勵佢繼續地區工作喎。
網民嘲不捨得公職收入
之不過有網民發現陳嘅貼文內容抄足朱順雅，連標題都係照搬。有睇唔過眼嘅網民鬧爆，話佢做到區議員絕對係奇迹，又點會輕易放棄公職收入呢？