因去年參與民主派「35+」初選，涉違反《港區國安法》，被控串謀顛覆國家政權罪嘅前議員尹兆堅前日透過團隊向民政事務總署遞信，辭任葵青區議員。葵青區議會尋日召開大會，會議上區議員劉子傑為尹讀出聲明，而區議會亦提出臨時動議，感謝尹及梁耀忠過往多年對嘅服務。但建制派區議員就睇唔過眼，話點解要用區議會時間搞個人崇拜呢？根本同區議會無關喎。
話說有區議員分別提出兩項臨時動議，感謝尹及梁耀忠對地區嘅服務。但建制派區議員梁嘉銘就反對，話唔贊成區議會搞個人崇拜、個人主義，又話呢啲議程同區議會無關，加上好多人都對區內有貢獻，反問係咪要感謝晒咁多個人呢？梁嘉銘同另一建制派區議員盧婉婷就投下反對票，但動議都係獲得通過。
其實梁耀忠都冇出席會議，亦有區議員代為讀出聲明。事關梁耀忠就前年8˙18未經批准集結案被判入獄8個月，獲緩刑12個月，根據《區議會條例》，若區議員被定罪並判處為期超過3個月嘅監禁，就會喪失議員資格嘅。