政情：律政司擬500萬開位捱轟 議員指司法改革更要緊
律政司今年2月去信立法會司法及法律事務委員會，提出開設兩個編外職位推廣法治，但每年開支逾500萬元，結果被議員轟不切實際，開位建議更被打回頭。有議員尋日喺立法會上重提事件，指司法改革刻不容緩，又鬧爆政府仲有好多問題要解決！
鄭若驊被轟未做好宣傳工作
議員周浩鼎話外國勢力經常對香港法治作出失實指控，認為鄭若驊作為律政司司長應高調反擊，又斥鄭未有做好法治宣傳工作，每年花費500萬元公帑開位宣揚法治根本唔值。
何君堯則強調立法同司法機關，唔可以對行政主導構成拖累，形容三者仿似「三人四足」，應把握契機改革。何又不滿本港實施《港區國安法》後，被身兼香港終審法院非常任法官嘅英國最高法院院長韋彥德（Robert Reed）質疑不合規，但政府同時任終審法院首席法官馬道立當時並無發聲。何又話政府存在諸多問題，包括未有善用北區20幾平方公里嘅黃金地帶發展科創產業，反而推行要等12年填海造地嘅「明日大嶼」。何仲點名批評香港電台耗用政府公帑，但就掉轉支炮去鬧政府，佢建議將港台同政府新聞處合併，既可慳錢，又可以減少冗員。