泛民樹倒猢猻散 時辰一到紛割席

貪勝不知輸,遲早變成豬!阿哥,豪情嘅說話易講,甚麼「以硬肩負重任,以強臂挽危局」,講就易,做就難!玩革命,不是請客食飯,不是叫叫口號,係要拋頭顱灑熱血,「已摒憂患尋常事,留得豪情作楚囚」,有幾多人真係做到?

現實卻係一旦困牢獄,洗廁好屈辱!唔驚就呃人!不久之前,最少55名民主派人士涉嫌以武力或非法手段等顛覆國家政權被捕。依家泛民被禁嘅被禁、着草嘅着草、退黨嘅退黨、官司纏身嘅有得震冇得瞓,昔日豪情,今剩哀音泣訴!唔再參加一切遊行啦!就算選皇帝都咪預我!哀家已冇力玩矣!果真係泛民樹倒猢猻散,昔日乳鴿紛折翼!係歷史嘅長河,輕輕的我走了,不留下一條羽毛!

理想很豐滿,現實很骨感。有指支聯會嘅五大綱領及口號涉違國安大法,繼「梁耀忠議員辦事處」早前退出支聯會後,陸續有民主派人士退出;有報道引支聯會秘書蔡耀昌指,現時支聯會約有200個會員團體,過去數月暫有3個辦事處申請退出。呢,公民黨主席梁家傑亦與支聯會劃清界線,跳出來稱公民黨從沒有加入過支聯會。

阿哈!身為藍血貴族果然「識時務者為俊傑」,梁家傑果然冇改錯名,一家之傑,精甩尾,唔會留啲蘇州屎畀家人愁啩?睇吓國安重犯漢奸黎囚喺赤柱監獄,日日洗廁所,話就話囚嘅係佢肉身,困唔住佢思想喎!之不過,成日見到佢老婆仔女愁眉深鎖咁去探監,就認真冇癮啦!所以知大勢嘅梁家傑,不久前回顧公民黨成立15周年,就指公民黨「盛衰各有時,世代更迭,人事遞嬗」,縱使現時前景晦暗,公民黨成立初衷冇改變、靜待黎明喎!

不過,點講都好啦!公民黨改唔改變初衷都冇乜所謂咯!嗱!嗰位聲大大冇貨賣嘅公民黨前立法會議員郭榮鏗已率先走佬加拿大,其餘嘅如楊岳橋、譚文豪、郭家麒、李予信,因「參與35+」初選被控串謀顛覆國家政權罪,現正被還押,4人都經已退黨!梁家傑回覆傳媒查詢時,指佢自己及公民黨均冇加入過支聯會,所以無所謂退出,又反問是否做義工亦要退出?

做慣訟棍,果然深明巧言令色之道。連荃灣區議會主席陳琬琛都去信支聯會,指加入30年來從冇參與任何會議,名單亦冇更新,唔知有否機制退出喎!世易時移,大江東去,依家啲蝦兵蟹將,個個爭住做識時務者,隨着泛民時辰一到紛割席。去一轉維園,隨時要陪漢奸黎赤柱洗廁所,邊個會咁傻唔識死吖!