政情：西貢區會通過動議 拒混凝土廠遷將軍澳
政府早前計劃將油塘東源街嘅混凝土廠搬去將軍澳第137區，但遭到將軍澳居民大力反對。西貢區議會尋日就通過動議，話為保障將軍澳居民嘅健康同生活環境，要求發展局終止喺將軍澳重置油塘混凝土廠嘅研究，仲舉行聯署，至今已經有5,000名居民反對喇。
5000居民聯署反對
西貢區議員方國珊尋日喺區議會提出動議，指區內唔少居民對重置混凝土廠嘅計劃感到震驚，質疑發展局罔顧居民健康，唔應該將混凝土廠搬去近年人口激增嘅將軍澳區。佢仲話將軍澳已經有建築廢料堆填區同埋填料庫，每日逾千部泥頭車經過將軍澳，如果加多個混凝土廠，將會加劇區內污染！
話說油塘東源街混凝土廠引起空氣污染等問題，因未能符合《空氣污染管制條例》被環保署拒絕其續牌申請。依家觀塘區同埋西貢區都唔想要呢間混凝土廠，唔知政府最後點處理呢？