政情：辭任區議員「有手尾跟」 畢東尼向居民求救
區議會爆發「辭職潮」，其中觀塘區議員畢東尼同北區區議員袁浩倫嘅議席，將於下月1日正式懸空。畢東尼之前滯留英國多個月，被狠批拋低居民，如今辭職竟然仲要向居民求救。
袁浩倫辦事處 提早本周六停開
畢東尼由於身體抱恙辭任區議員，嚟緊仲要進行手術。佢尋日喺社交網站發文話「東尼有難」，原來係講緊之前簽落4年嘅影印機租機合約要提早結束，佢要自己承擔餘下接近4萬元嘅費用同解約金。但佢話喺任期開始前冇預計身體狀況會轉差，對需要支付嘅費用感到無奈同埋難以負擔，所以向大家求助。佢話有關公司提出免除解約費用嘅方案，就係要搵到一個有興趣租用影印機服務嘅人幫佢接替合約喎。
至於北區區議員袁浩倫就因為拒絕宣誓而辭職，佢話計過要收拾物資同埋處理行政嘅時間，辦事處將會提早喺今個星期六就停止開放，再一次感謝支持同信任佢嘅街坊咁話。