政情：防火會 泛民冇得留低 建制派敗部復活
民政事務總署早前公布新一屆防火委員會名單，多區民主派區議員都被踢出防火會。前日署方公布埋最後一區，即屯門新一任防火委員會名單，同樣未見民主派人士，例如民主黨何杏梅、民協甄紹南上屆都係委員，今次統統被踢走。而多名前年區選落敗者，包括甘文鋒等人則榜上有名。
甘文鋒獲委任屯門區主席
甘文鋒不但喺名單內，而且被委任為屯門防火會主席，佢就話，過去當局一直都批評現屆區議會失效，做唔到任何嘢，如果一邊話區會有問題，一邊委任泛民區議員，就冇意思啦；仲笑言防火會都算，如果撲滅罪行委員會都畀佢哋就真係麻煩啦。
至於今次獲委任防火會主席，佢就話自己之前都做過幾年，可以話係有經驗。其實除咗甘文鋒外，多名前建制區議員亦都敗部復活，當中包括陳文華、陳文偉。