政情:非法集結獲放生 何俊仁「玩火自焚」

支聯會尋日傍晚去到香港大學洗刷「國殤之柱」,悼念六四事件32周年。之不過,喺靜默開始後就發生小插曲,早前因8 ‧ 18未經批准集結案罪成被判囚12個月獲緩刑兩年、被狙擊律師資格嘅支聯會副主席何俊仁,手持嘅蠟燭突然燒着咗包圍燭芯嘅紙杯,仲要揈極都唔熄,最後要用腳踩熄先搞得掂,今次真係「玩火自焚」。佢哋又高叫「平反六四」同「結束一黨專政」等口號。

口號涉違國安法 挑機照嗌

話說靜默開始唔夠5秒,何手上拎住嘅蠟燭就突然冒大煙,當時佢仲想故作鎮定繼續靜默,點知火勢變大,見佢諗住搖熄蠟燭但唔成功,最後只能夠將支蠟燭掟落地下用腳滅火,情況真係頗為尷尬啊!

至於六四集會安排方面,另一位副主席鄒幸彤就話會堅持喺維多利亞公園悼念六四,佢哋已向警方申請不反對通知書,但仲未收到警方通知,依家會以舉辦實體集會嘅方向安排集會。

之但係,支聯會嘅綱領同喺過去六四集會上所叫嘅口號為「結束一黨專政」,唔少法律界學者及律師都認為,呢個口號好大機會觸犯《港區國安法》,而何俊仁同支聯會成員喺活動中仲高叫有關口號,如果佢哋繼續堅持嘅話,睇怕會惹出火,隨時玩火自焚嘞!

第一手消息請下載on.cc東網iPhone/iPad/Android/Windows Phone Apps