政情：勞工商界齊討伐 羅致光扮委屈

羅喺網誌話2017年上任初期，喺多個公開場合表達勞工政策「應該稍為偏向基層勞工」嘅見解，亦可能加上佢個人嘅社會福利界背景，有幾名代表工商界嘅議員都表達擔憂，更有人講笑話佢會將「勞工及福利局」變成「勞工福利局」；而持政策立場另一邊嘅人士，就話佢係「自由經濟主義」者，偏向商家。

自稱屬「中間偏左」

佢重申，自己喺勞工政策屬於「中間偏左」，只不過左邊嘅人會認為佢偏右，右邊嘅人就會認為佢偏左。佢以家庭友善的勞工政策、防止工傷及復康服務，以及法定假日同公眾假期看齊等幾項政策為例，佢被部分勞工界批評係偏向商界，而同時被部分商界批評係向佢哋開刀。

講到取消強積金（MPF）對沖，佢話喺2018年公布優化方案後，勞工處着手草擬法例嘅工作，當中涉及修改7條現有法例，另加修訂《稅務條例》同新增一條實施「專項儲蓄戶口計劃」嘅法例，目標喺下屆立法會開始時，盡快提交條例草案。

被指應有被罵準備

勞工顧問委員會勞方委員譚金蓮直指取消強積金對沖、統一假期係特首對打工仔嘅承諾，惟羅卻一直「拖、拖、拖」，現屆政府任期即將完結都未落實，形容講得多，但做唔到。佢又批評羅以「學者思維」處理議題，導致方案離地。對於羅話畀勞工界同商界批評，譚話「做得這職位理應對此有心理準備」，直指羅應了解自己嘅角色，而唔係以「做又被人罵，不做又被人罵」嘅心態看待。

正所謂「食得鹹魚抵得渴」，羅既然入得「熱廚房」，早就知道政策無可能討好社會上所有持份者。睇佢平時咁寸嘴，早前有議員對佢提出質詢時，佢竟然一直低頭睇平板電腦，冷待議員，而依家又講到咁委屈，真係好難令人幫得落（口架）喎！