政情：憂大埔建過渡屋 加劇塞車 陳克勤斥運房局多番推諉
輪候公屋時間飆升，而各區的交通又塞爆。運輸及房屋局計劃喺大埔汀角黃魚灘興建過渡房屋嘅項目，可能導致住屋同交通問題都搞唔掂。有議員指政府構思項目時忽略附近居民，促請局方要一併解決附近嘅社區問題啊。
議員陳克勤（克勤）話汀角路嘅交通燈組合唔太協調，逐盞逐盞燈咁停，平日出行已經好艱難。雖然附近嘅龍尾泳灘未正式開放，但每逢假日照樣吸引好多市民，加劇塞車問題。若果配套未完善的話，新增人口會令已呈惡化嘅交通問題雪上加霜。
加設火牛房惹安全隱憂
除興建過渡性房屋，政府又打算加設火牛房配合項目，不過位置好接近附近嘅村屋，安全問題令人憂慮，再加上散熱問題，有居民話唔敢開窗添。佢前日約見運房局副局長蘇偉文，引述對方話會重新考慮火牛房嘅位置。克勤又話，其實過去一直指出汀角路一帶存有交通、水浸、排污等問題，但政府都以唔同理由多番推諉。既然政府喺區內推出過渡房屋計劃，克勤促請局方把握機會，一併解決困擾多時嘅社區問題喇。