政情：辭官移居星洲 黎穎瑜將任港台主持
今年1月初以家庭理由辭職嘅民政事務局前政治助理黎穎瑜，早前向前任行政長官及政治委任官員離職後工作諮詢委員會申請擔任嘅3項工作，尋日政府宣布均已獲批，當中包括7月1日起喺香港電台（港台）第二台擔任節目主持人。
獲相關委員會批准
黎穎瑜喺舊年12月同一眾副局長同政治助理宣誓擁護《基本法》同效忠特區，事隔1個月就以家庭理由請辭，當時已有聲音質疑黎係「跳船」，但佢解釋，係要跟隨新加坡籍丈夫到新加坡一齊照顧囝囝。黎申請擔任嘅3項工作，分別係由今日起，喺「音樂兒童基金會」擔任「項目顧問」；由6月1日開始，喺「中華國術總會」擔任「共同作者和編輯」；以及由7月1日開始，喺港台第二台擔任節目主持人。有關委員會已批准全部3項申請，但就特別提醒黎喺參與電台節目或相關活動時，唔應該表達任何與擔任政治助理相關而可能會令政府尷尬嘅內容。