政情：開會扭親頸 田北辰搶用隔籬咪
立法會會議室每個座位都有設立咪高峰，議員一人一個咪理應好公平呀。但係議員田北辰（田二少）竟然搶隔籬位個咪嚟用喎，乜咁霸道啊？
怨咪位設置令人摸不着頭腦
振興香港經濟事宜小組委員會尋日開會，田二少發言嗰陣問主席可唔可以用另一邊嘅咪講嘢，話驚條頸扭親喎。開完會之後，田二少忍唔住吐苦水，話會議室2A嘅設計令佢摸不着頭腦，皆因議員嘅咪設置喺左手邊，但係政府官員就坐喺右手邊，令佢好多時側埋個頭喺左邊，但又要望住官員發言喎，講到入肉咪搞到扭親條頸囉。佢話喺上次坐會議室2A整親，一直都赤赤痛啊。
雖然係麻煩，但田二少打算日後每次都要求用右邊嘅咪發言，無謂再整親喇。不過佢話隔籬位有人坐就仲麻煩喇，下次開會可能要揀定個四周都無人嘅靚位啊！