中環出更:申請失利達11次 何俊賢仍零動議

議員可以透過提出質詢同議員議案去監察政府施政,但議員議案需要經過抽籤,抽中先可以提出。根據最新嘅紀錄,申請失利次數最多嘅係漁農界議員何俊賢(高佬賢),有成11次咁多,至今仍然係零動議。實際上,佢亦都有幾個月冇申請動議辯論,唔通佢偷懶?

議員議案雖然係無約束力,但過往都曾經出現過因議案獲跨黨派支持,最終政府需要「補鑊」喇,所以議員議案其實都唔係冇用嘅。

曾申請 後讓路予黨友

根據最新一份立法會文件,截至尋日為止,高佬賢嘅申請失利次數多達11次,仲要上任至今都未獲編配過辯論時段添,認真黑仔喇!佢接受查詢時就話因為新冠肺炎疫情影響咗立法會大會議程,令議員議案都冇辦法提出,所以早排冇入到喇!

依家會議開始回復正常,高佬賢話嚟緊準備申請提出議員議案,依家仲考慮緊議案,但都會同業界相關咁話喎。佢亦透露,其實之前都有申請議員議案,但見到黨友葛珮帆提出同教育有關嘅議案,所以決定先讓路,等葛提出先。佢仲預計自己係累積失利次數最多,相信今個會期應該會可以討論到由佢提出嘅議案,仲形容「中硬」咁話。

卓妮

第一手消息請下載on.cc東網iPhone/iPad/Android/Windows Phone Apps