笑看天下:解牛箍咒義不容「遲」

一個地方是否文明,政府對基層市民是否關顧,對人口老化是否上心,通常見微可以知著。呢,基於眾生平等,本報尊重生命,亦尊重動物權益,真正做到大愛無疆!連日來追蹤並翔實報道西貢牛「531」慘遭漁護署套上追蹤頸圈,呢舊醜陋嘅「緊箍咒」連日來令「531」痛苦流淚,見者無不為之心酸!

可恨庸官一味死撐狡辯,一時話牛牛已經習慣,一時話係敏感流淚,要言之,就係舉手之勞都唔肯做,搞到老朽都好勞氣,想學吓行為藝術舉中指問候吓一眾庸官,究竟是甚麼東西才可練就如此麻木不仁?

本報有圖片有真相,更親自去西貢視察,發現「531」精神委靡,意志消沉,人道「英雄最怕病來磨」,牛牛最怕頸箍咒,記者但見佢一直躺在草地上,雙眼更見淚痕,狀甚痛苦。雖然愛護動物協會一名人員到場探望,可惜仍未能撫平「531」嘅受驚情緒。有區議員指「531」情況每況愈下,情緒和精神均不如以往,認為漁護署應該盡快到場視察以及即時拆除其頸圈!

該區議員更建議署方應保育草地和水源,讓牛隻不會四出覓食,以防止意外發生,而非只係追蹤其行蹤作研究,若署方一意孤行,不排除發起民間聯署表達意見。其實講到尾,都不如東方報業集團獻「貓狗善終園」藍圖,一站式為動物提供生養死葬服務,同時加埋牛牛,圈兩大塊草地畀佢哋!咁正咁有建設性嘅藍圖,庸官就完全當睇唔到,有議員怒斥政府「連照抄都唔肯」。

唉!庸官怠政,病入膏肓,已去到無可救藥!庸官至叻左推右推,砌詞狡辯話外國冇先例,又或是冇土地!其實,只要思想不滑坡,辦法總比困難多!不少地方包括堆填區復修後嘅山旮旯地區都有空地,將軍澳嘅環保大道寵物公園都係建於復修區上,漁護署唔想變「漁虐署」就咪諸多藉口囉!