政情：講稿架飛脫 林健鋒尷尬求助
立法會開會期間周不時都會發生小插曲！經民聯議員林健鋒（Jeffrey）尋日喺會上本來就住政府推展皇崗口岸「一地兩檢」安排發言，點知講講吓嘢突然停咗，仲一臉驚慌咁向其黨友、立法會主席梁君彥求救，究竟發生咩事呢？
原來喺Jeffrey發言期間，諗住將講稿揭去第二頁，點知擺放講稿嘅木架就突然爛咗，成塊木板更加甩咗出嚟，搞到Jeffrey手足無措，好無助咁拎住塊木板向主席求救話「主席，要整整（木架）啊」，立法會職員見狀亦即時為佢更換新嘅木架。Jeffrey之後繼續發言，仲趁機抽水話「皇崗口岸已興建多年，設施老化，就好似呢個講台咁樣」。
Jeffrey事後就指木架嘅燒焊位置斷咗，所以搞到成塊木板飛脫出嚟，又話當時講稿各散東西，搞到佢不知幾尷尬。佢笑指唔排除有議員發言時「好肉緊、又拍又揼」，所以都提醒職員檢查清楚每個木架接駁位置係咪完好。