中環出更：港府企硬加股票印花稅 張華峰倡設日落條款
政府於《財政預算案》中宣布將股票交易印花稅由0.1%增至0.13%。金融服務界議員張華峰（肥老闆）激到紮紮跳，狠批政府殺雞取卵，屢勸政府收回「成命」。之不過政府似乎無動於衷，肥老闆惟有「讓步」，建議政府可以採取單邊收費，及設日落條款。
憂被外國「搶客」
肥老闆一直狠批政府加稅係殺雞取卵，佢早前接受傳媒訪問時表示，政府想透過加稅為庫房每年帶嚟120億港元收入，但其實賣一、兩幅地皮都已經賺到啲錢喇，又使乜咁大陣仗嚟加稅呢。而環顧主要嘅股票交易所，例如美國、新加坡就已經豁免徵收股票印花稅，喺資訊發達嘅情況下，令佢哋好容易「搶客」。
不過，政府表明無後備方案，仲預料喺今年8月1日生效添。見到根本無彎轉，肥老闆建議政府效法內地，只係單邊增加稅項，唔需要向買賣雙方同時加稅。而且，政府預計下半年經濟有望復甦，肥老闆就話實施印花稅時已經係下半年，唔明白點解要急急腳推出措施。佢亦建議喺經濟復甦後，政府可以將稅率「還原基本步」啦。
卓妮