政情：指政治轉變極快 教協退出民陣
多個團體近日相繼退出民間人權陣線（民陣），香港教育專業人員協會（教協）尋晚亦宣布，因為考慮到最近嘅政治形勢，決定終止參與民陣嘅工作同會議，並即時生效。教協副會長葉建源回應查詢時表示，依家政治情況轉變極快，對於宣布冇特別補充，退出民陣亦係啱啱決定。
外媒指民陣受查或遭取締
在此之前，香港民主民生協進會（民協）、街工、公民黨、新民主同盟等亦宣布，停止參與民陣嘅工作同會議。民陣召集人陳皓桓早前就表示，只要有團體成員留低，民陣就會繼續堅持工作，而佢尋日回應傳媒查時就話，唔願意評論依家有幾多成員唔再參與民陣會議同工作，只會等個別團體自行公布。佢喺回應中又重申，會尊重任何團體嘅決定，又話只要有團體留低，民陣仍會繼續堅持有關工作。
今次民陣退會潮係自本月初開始，當時有外媒引述消息指，政府相關部門正調查民陣，仲話一旦證實民陣曾經收過美國國家民主基金會（NED）嘅資金，民陣就會被視為違反《港區國安法》，當局會喺短時間內引用《社團條例》將佢取締。